مش المقصود من العنوان ده إني أوضح العلاقة بين الشريعة والحياة، ولكن المقصود إني أتسائل، هي فين العلاقة بين الشريعة والحياة في هذا الزمن؟؟
لما نيجي نبص على كل حاجة حوالينا هنلاقيها تقريبا فارغة من الدين وبالتالي فارغة من الأخلاق، زي علاقة الأخ بأخوه، أو الوالدين بأولادهم والعكس، أو الزوج والزوجة..
تعالوا كدة نبص مثلا على علاقة الوالدين بأولادهم والعكس، هتلاقوا فيه جحود، لا مبالاة، عدم طاعة، الأم فرحانة إن بنتها نازلة الجامعة بملابس كاشفة لعورتها سواء كانت محجبة أو غير محجبة، ده غير الميك أب طبعا، والأب شايف كدة وساكت وممكن يكون مبسوط عشان فاهمين إن كدة البنت هتجيب عرسان.. نفس الحكاية بالنسبة للولد، الولد يستغل إنه ولد فيعمل نفسه راجل يخرج ويدخل زي ماهو عايز وبدون إستئذان أو حتى إعلام أهل البيت هو رايح فين وجاي منين، ده بالإضافة للمنظر العام من بنطلون ساقط وشعر منكوش أو محلوق بطريقة مستفزة تمسخ من خلقته الي ربنا خلقه عليها، وبرده الأب والأم مبسوطين بيه لأنهم فاكرين إنه كدة بيكون راجل.. وأفعالتانية كتير زي الخناق وعلو صوت الإبن على أبوه أو ضرب الأب لإبنه وبنته، إلخ إلخ.. يعني من الآخر آية وبالوالدين إحسانا دي ممسوحة من قاموس التربية، وكذلك كل أوامر النبي عن كيفية معاملة الأباء لأولادهم مش موجودة أصلا بل مش معروفة.
طب تعالوا نبص كدة على حاجة تانية، العلاقة بين الزوج والزوجة، بداية من أول مايتقدم العريس لخطبة العروس، البداية دي بتكون في دماغ كل واحد من الطرفين بشكل معين، يعني الشاب والبنت بيبقوا متربصين لبعض، وفيه ندية، هو فاهم إن الرجولة في الصوت العالي واللسان السليط والعين الحمرا، وهي فاهمة إن المرأة لازم ترد وتصد وتقف قصاده عشان مايعملش عليها سي السيد.. هو فاهم إن المرأة لازم تكون "أمينة" لازم تاخد على دماغها عشان ماتركبش وتدلدل رجليها، يعني من الآخر تحسوا إن الطرفين داخلين حرب مش زواج فيه سكن ومودة ورحمة.. ده غير إنه لما ييجي يختار يبص عالجمال ومش مهم حاجة تانية، زي الدين والأخلاق مثلاً، وهي لما تبص تبص هل عنده عربية ولا لأ ، وأهلها يشوفوا هيجيبلها شبكة بشيء وشويات ولا لأ، ومش مهم أي حاجة تانية برده، زي الدين والأخلاق مثلا..
دول مثلين بس من عشرات الأمثلة الي موجودة في مجتمعاتنا العربية الي إسمها (إسلامية).. فين الشريعة وأحكام الشريعة؟؟.. فين تحكيم شرع الله في كل شيء؟؟.. فين أساسيات الدين في حياتنا؟؟.. حد يجاوبني فين العلاقة بين الشريعة والحياة؟