منتدى قصة الإسلام

منتدى قصة الإسلام (http://forum.islamstory.com//index.php)
-   خواطر وأدب (http://forum.islamstory.com//forumdisplay.php?f=68)
-   -   لبيبة الهبلة و الثانوية العامة (http://forum.islamstory.com//showthread.php?t=15195)

محمد سنجر 18-09-2010 05:57 AM

لبيبة الهبلة و الثانوية العامة
 
( الازدحام الشديد جعلني أفضل النزول من الميكروباس ،
بادرني السائق )
ـ على فين يا أستاذ ؟
ـ إيه ؟ نازل أمشي أحسن ، مش شايف الزحمة ؟
ـ الثانوية العامة يا بيه كل سنة و أنت طيب ....
ـ ثانوية إيه بس ؟ مش ها يشوفوا لها حل بقى ؟
ـ إيدي على كتفك ، ده اللي عندهم واد في الثانوية بيبقوا زي اللي عندهم ميتم ، تصدق بإيه يا أستاذ ؟
ـ لا إله إلا الله .
ـ مراتي أعلنت حالة الطوارئ في البيت عشان البت ، أنت فاكر إني نازل عشان أدور على رزقي ؟ لا و اللي جمعنا من غير ميعاد ، ده أنا اتخنقت م البيت ، الكلام ممنوع ، البت بتذاكر ، التلفزيون ممنوع البت بتذاكر ، حتى الأكل بميعاد عشان البت لسه بتذاكر ، الله يقطع الثانوية العامة و اللي اخترعوها ، عشان كده قلت أنزل أفك عن نفسي شوية ...
ـ لا حول و لا قوة إلا بالله ، طيب ممكن ثواني عشان أنزل ؟
ـ ما هي واقفة أهي ، بس معلش ، هات الأجرة يا مواطن .
ـ آسف ... نسيت و الله ...
( مددت يدي في جيبي ، أخرجت صرة الدنانير ،
فضضتها و أخرجت منها إحدى العملات المعدنية ،
ناولته إحداها و نزلت وسط الزحام الشديد ،
هرج و مرج هنا و هناك ، اختلط الحابل بالنابل ،
حاولت التسلل من بين الأجساد المتلاصقة ،
فجأة سمعت صرخة مدوية )
ـ مش تفتح يا أعمى ؟
( نظرت لصاحب الصرخة ،
و إذا بها لبيبة الهبلة تجلس على الأرض ،
تغير تعبير وجهها عندما رأتني )
ـ كده برضة تدوس عليا ؟ يعني ما تجيش غير منك يا أستاذ ؟
ـ معلش آسف يا خالة لبيبة ، ما شفتكيش و الله ، إنتي إيه اللي مقعدك كده؟
ـ مش الواد (حمو) عقبال أمالتك في الثانوية السنة دي ؟
ـ معقولة ؟ اللهم صل ع النبي ، حمو بقى في الثانوية العامة ؟ بسم الله ما شاء الله ، و الله أنت ست بميت راجل ، طيب تعالي نقعد بعيد بدل ما أنتي قاعدة كده في الأرض و حد يدوس عليكي .
( مددت لها يدي فأمسكت بها و وقفت )
ـ آخ ياني ، الله يقطع الثانوية و اللي عملوها ، مش تقول لهم يا أستاذ يلغوها أحسن ؟
ـ يلغوها إزاي بس يا خالة لبيبة ؟ أمال نعرف إزاي مستوى كل طالب عشان يروح الكلية اللي يستحقها ؟
ـ طب بذمتك يرضي مين إن الواد أو البت من دول يتحدد مستقبله على سنة واحدة ؟
ـ ما احنا عملناها سنتين قولتوا جــــــــــــــــــاي ، رجعوها سنة واحدة .
ـ أيوة ما هو الناس بدل ما كانوا بينصبوا الميتم سنة بقوا بينصبوه سنتين .
ـ طيب أهو ، أديك بتقولي ، نعمل إيه إحنا بقى ؟
ـ خلوها من أول العيل ما بيدخل المدرسة من أولى ابتدائي ....
ـ مش فاهم ؟
ـ يعني العيل من أولى ابتدائي لغاية ما يوصل للثانوية العامة كام سنة ؟
ـ اتناشر سنة تقريبا .
ـ الله ينور عليك ، درجاته بقى في الاتناشر سنة دول مع بعض هم اللي يودوه الكلية المناسبة .
ـ قصدك ناخد مجموع درجاته في السنين كلها و نقسمهم على اتناشر ؟
ـ أني عارفه بقى ؟ قسموها زي ما تقسموها ، المهم ما يقفش مستقبل العيل على سنة واحدة ، بذمتك ده عدل ؟
عيل طول عمره بايظ و يجي في الثانوية العامة بالفلوس و إلا بالغش يدخل طب و الا هندسة و الا معهد فني تجاري ؟
و واد تاني زي (حمو) ده طول عمره الأول و جه السنة دي تعب و الا ظروفه كانت وحشة يروح في ستين داهية ؟
بالذمة هو ده العدل بتاع ربنا ؟
ـ مش عارف و الله يا خالة لبيبة ، بس ها أحاول أكلم لك وزير الثانوية العامة حاضر و ندرس كلامك ده ، ليه لأ ؟
ها استأذنك أنا بقى عشان عندي مشوار مهم ....
( أخرجت سرة الدنانير التي أثقلت جيبي ، هممت بفضها لأخرج لها بعض العملات المعدنية ، إلا أنني آثرت الخلاص منها ، فقذفتها إليها ،
طارت لبيبة كما يفعل الحضري لالتقاط شقة البطيخ من زوجته ،
نادتني من بعيد )
ـ إلاهي ربنا يسترك يا بيه ، إوعى تنسى تكلم لنا وزير الثانوية العامة ....
( أشرت بإصبعي من العين دي للعين دي و رحلت أقلب حلها العبقري )

ramevic 18-09-2010 06:05 AM

رد: لبيبة الهبلة و الثانوية العامة
 
احيانا الحكم تصدر من افواه الهبل

محمد سنجر 19-09-2010 11:26 PM

رد: لبيبة الهبلة و الثانوية العامة
 
اقتباس:

المشاركة الأصلية كتبت بواسطة ramevic (المشاركة 81365)
احيانا الحكم تصدر من افواه الهبل

نعم
معك حق
و أما عن حل الخالة لبيبة
فطبعا يحتاج إلى بعض البهارات
فمثلا يجب لمن يدخل كلية الطب أو كلية العلوم أن يكون حاصلا طوال دراسته على درجة عالية في العلوم
و كذلك كلية الهندسة ينظر في ارتفاع درجاته طوال دراسته في الرياضيات
و كذلك من يريد الالتحاق بكلية الآداب قسم التاريخ أن يكون حاصلا على درجات مرتفعة في التاريخ و هكذا
و هذا سيحد بل سيمنع التلاعب تماما
فلا يمكن لإنسان أيا كان أن يحدد مصير طالب و مساعدته بالواسطة أو بالفلوس طوال 12 سنة

تحياتي و تقديري لكم

محمد سنجر 19-09-2010 11:28 PM

رد: لبيبة الهبلة و الثانوية العامة
 
اقتباس:

المشاركة الأصلية كتبت بواسطة شادى الظاهر (المشاركة 81379)
من قال انها هبلة كلام عين العقل


مع الأسف يقولون عن الإيجابي الذي يبحث عن حلول
أهبل
لأنه استخدم عقله لحل مشكلة ما اعترضت طريقه
و لم يقف مكتوف الأيدي

تقبل تقديري و احترامي


الساعة الآن 08:16 AM.

Powered by vBulletin® Copyright ©2000 - 2020, Jelsoft Enterprises Ltd.
Content Relevant URLs by vBSEO 3.3.0 , Designed & TranZ By Almuhajir
جميع الحقوق محفوظة لمنتدى قصة الإسلام