منتدى قصة الإسلام

منتدى قصة الإسلام (http://forum.islamstory.com//index.php)
-   خواطر وأدب (http://forum.islamstory.com//forumdisplay.php?f=68)
-   -   قصيدة (ايه الحكاية يا وطن). (http://forum.islamstory.com//showthread.php?t=17711)

هاشم فتحي 24-12-2010 09:51 AM

قصيدة (ايه الحكاية يا وطن).
 

بيني وبينك خطوتين:


ما تقولي فينك؟!!

طول عمري شايلك في العيون

الله يعينك

أنا نفسي أقولك كلمتين

بيني وبينك:

فينك يا شعب؟!!!

وفين تاريخك يا وطن؟!!!

ضاع من سنين

فين اللي كنا بندرسه

وف كل صبح نردده

مش باقي منه صفحتين

فين التاريخ اللي أنكتب؟!!!

وقرينا عنه في الكتب

في المدرسة

مش باقي منه حصتين

ما فضلش في كتاب الوطن

غير الأنين

كل السطور الحلوة

راحت يا وطن

حتى الكلام اللي اتولد

ما فضلش منه كلمتين

حتى الشعور اللي اتخلق

يوم النصر

ساعة الضهر

مش باقي منه حبتين

حتى النشيد اللي أتعزف

لحنه اللي كان بيهزنا

وف كل حارة يلمنا

قوم قلنا:

وديت كتاب النصر فين؟!!

قوم قلنا:

دانت اللي ساري ف دمنا

وف كل ثانية ف حلمنا

وديت ليالي الفرح وين؟!!!

قوم قلنا:

إيه اللي باقي ف فرحنا

إيه اللي خلى الطير ما يعرف عشنا

والبسمة غابت عنّنا

والدمعة ماتت في العنين

إيه الحكاية يا وطن؟!!!

مين غيرك

مين اللي واقف ع الخريطة يبعثرك

ما تقولي: مين؟!!!

فاكر سؤال في المدرسة:

بتحب مين؟!!!

قلت الوطن

علل ووضح يا ولد؟!!!

قلت: الحضارة والزمن

وقف المعلم وانتفض

ويقول: منين

إيه الحكاية يا وطن

دانت الملاك

ولا كنا نعرف في الزمن دا غير سواك

كنا بنسمع كلنا

صرخة طويلة

"مين هناك"

ويلف عمي الشيخ صلاح

شيخ الخفر

يرسم على جبين الصباح

ويقول: فداك

هنقول لمين ونعيد لمين

إيه الحكاية يا وطن؟!!!

وليه بتهرب م السؤال:

ليه البداية

واقفة في شباك المحال

ليه الدموع بتهزنا

ونقول محال

دانت الإجابة والسؤال

قوم قلنا:

دانت اللي ساري في دمنا

دانت اللي باقي ف حلمنا

والله يعين

بيني وبينك خطوتين

سامع كلامك

بيني وبينك يا وطن

مش قادر أنسى يوم غيابك

كنا بنحلم والأمل

نمشي ف ترابك

قوم قلنا

دانت اللي واخد عقلنا

وف كل صفحة ف جرحنا

إيه اللي صابك

إيه اللي خلى الحلم يهرب

والنجوم تايهه ف ضبابك

دوختني.....

ما تقول خلاص

عذبتني.....

فين الخلاص

أنا لسه واقف عند بابك

عذبتني

ما تقولي:

إيه معنى السكوت؟!!

ليه الأسى مكتوب عليك..

والفقر ساكن فوق سحابك

عذبتني

ما تقولي إيه خلاك تموت

ليه الكفن مكتوب عليه؟!!!

اسمك ومختوم بانتحابك

ليه الجنازة عند بابك كل يوم

ليه الغلابة عند نيلك يعطشوا

والنيل بيجري كل يوم

عذبتني

ما تقولي إيه خلاك تعوم

وتروح تقوم تشقى بسرابك

قوم قلنا:

دانت الليلادي ف حضننا

ولا عمرنا ننساك يا غالي

عمرنا

ويمر طيفك عندنا

وتقوم شوارعنا القديمة تضمنا

وتقول: وطن

ونطوف نردد في المدينة:

يا وطن

ونقول: فداك

دانت الملاك

والكل يهتف يا وطنا

"مين هناك"


Dr.asmaa gamal 24-12-2010 05:11 PM

رد: قصيدة (ايه الحكاية يا وطن).
 
السلام عليكم ورحمة الله وبركاته

جميل ورائع جدا , هو حضرتك أ. هاشم فتحي الشاعر ؟؟

هاشم فتحي 27-12-2010 03:49 AM

رد: قصيدة (ايه الحكاية يا وطن).
 
كم شرفني مرورك الكريم دكتورة اسماء جمال
عندما يمر الطبيب بمشرطه على جسد قصيدة لي فهذا شرف لي واتمنى ان انشر علىصفحتك في الفيس بوك
نعم انا الشاعر هاشم فتحي
شكرا لك مرة اخرى
ابو خلاد
هاشم فتحي
او
هشام فتحي

أم عمار 30-12-2010 03:58 PM

رد: قصيدة (ايه الحكاية يا وطن).
 
جزاكم الله خيراً

كلمات رائعة ما شاء الله


الساعة الآن 02:44 AM.

Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.3.0 , Designed & TranZ By Almuhajir
جميع الحقوق محفوظة لمنتدى قصة الإسلام