صينية جلاش باللحم المفروم بس إيه .... إوعى
قبل ماأقوللكم ع الطريقة اللى بتخلى أسرتى وصديقاتى لما أعملها يبقوا عايزين يقرقشوا الصينية نفسها ورا الجلاش أحب أعرفكم إنى فى كل الأكلات الحاذقة لاأتبع مقادير ولكنى أعمل بإحساسى الشخصى ، بعكس الحلويات اللى لازم المقادير تكون دقيقة فيها
بس علشان ماأحيركوش هاحاول أقول مقادير تقريبية لعمل صينية كبيرة الحجم مستطيلة
المقادير
- كيلو جلاش ( أنصح باستخدام باريس عن خبرة فى تجريب كل الأنواع الأخرى )
- نصف كيلو لحم مفروم +2 بصلة كبيرة مفرومة ويتم تعصيج اللحم مع إضافة الملح وكل التوابل التى ترغبين بها ثم تصفى من المياه الزائدة تماما
- 5 قرون فلفل رومى ويقطع قطع حجم الواحدة حوالى 2 سم
- 200 جم زيتون إسود مخلى ومقطع حلقات
- 3 حبات طماطم كبيرة وتقطع قطع صغيرة
- مشروم ( حسب الرغبة )
- 200 جم جبن شيدر مبشور
- سمن سايح أو زيت لدهان الصينية وبين الطبقات
- 2 بيض
- 1 كوب لبن
الطريقة
1. يحمر الفلفل الرومى المقطع فى الزيت قليلا ثم يضاف إليه الطماطم ثم المشروم مع استمرار التحمير حتى تذبل الخضروات قليلا ثم أطفئى النار
2. يضاف اللحم المعصج لخليط الخضروات ثم يضاف إليهم الزيتون المقطع والجبن الشيدر وتوابل مرة أخرى وملح حسب الرغبة
3. تدهن الصينية سمن أو زيت وترص ورقات الجلاش واحدة تلو الأخرى مع دهان السمن أو الزيت بين كل طبقتين حتى ينتهى نصف مقدار الجلاش
4. نضع الخليط السابق عمله ونساويه فى الصينية ونبدأ برص باقى ورقات الجلاش فوقه وأيضا بين كل طبقتين يرش السمن أو الزيت حتى ينتهى مقدار الجلاش
5. تقطع الصينية بالسكينة
6. يخفق البيض مع اللبن ثم يضاف للصينية قبل دخولها الفرن مباشرة
7. توضع فى الفرن فى درجة حرارة متوسطة حتى النضج
ملحوظة : يمكن استبدال اللحم المفروم بدجاج مخلى ومقطع أو سوسيس أو هوت دوج مقطع ومحمر مع إضافة باقى المكونات كما هى ، بس الأحسن نبعد عن السوسيس والهوت دوج لحد ماتنتهى أزمة الخنازير دى على خير
أنا مقرفة ، قرفتكوا ع الأكل ، معلش :)
يارب تعجبكم الصينية وبالهنا والشفا
:):)