منتدى قصة الإسلام

منتدى قصة الإسلام (http://forum.islamstory.com//index.php)
-   خواطر وأدب (http://forum.islamstory.com//forumdisplay.php?f=68)
-   -   شكر وفكر (http://forum.islamstory.com//showthread.php?t=36634)

الشاعرلطفي أمين 15-04-2012 02:52 AM

شكر وفكر
 
ماتيجوا بينا شويه ننسي الحكام والمحكومين
خلي المركب بينا ترسي ونعرف حتي احنا مين
ربك لما خلقنا عمل شرع لينا ولينا دين
واحنا في حياتنا تهنا عن حياة المرسلين
لما ربك خلق آدم كان انسان وحيد في الكون
ومن بعديه خلق له حوا تبقي معاه وهي العون
ولما أراد للدنيا تعمر بكل شكل وكل لون
حذرنا من الدنيا الفانية ومن شيطان رجيم ملعون
واصطفي أنبيا ورسل سلامنا ليهم أجمعين
واللي خاتمهم كان محمد هو امام المهتدين
أرسله ورسالته رحمة باقية معانا ليوم الدين
بس نفكر فيها شويه وكل أمر علينا يهون
هنعرف ان الدنيا مطيه والباغي فيها مفتون
وجدودنا في الدنيا سادوا وأفادوا في كل حين
لما سمعوا كلام رسولنا عاشوا وماتوا مرتاحين
بعد ما ربك جعلك مسلم اوعي تعود من الفاسقين
اللي لايحمد ولا بيشكر ويكره كل المتقين
والتوحيد دي نعمه تامه عايزه شكر وعايزه لين
بس ازاي أعالج قلبي من أحقاد دامت سنين
ونقرب من بعض ونسأل عن مريض راقد حزين
أو واحد مننا في كربه ندعيله ونقول آمين
ونسامح بعضينا ونعفو و العفو سمات الصالحين
وارمي حملك علي خلقك ربك عنده كن فيكون
قاعد شايل هم بكره ورزقك يا محتار مضمون
لما تحسب نعمه واحده هتلقاك لله مديون
لو سألت مره الأعمي العين تساوي كام مليون
والأخرس وانت بتتكلم عجز لسانه منك فين
وكام مره بتتعظ فيها لما تشوف انسان مجنون
أوعاجز وايديه مشلوله اديله ايديك وخد بليون
واللي بيغسل كليه يوماتي وجوا عياه هوالمسجون
انت أحسن منه في ايه ولا لله دافع عربون
احمدربك وانت في صحه لو عقلك ناضج موزون
وخفف حملك من أوزارك احفظ جارك كن حنون
وخلي حكم ربك عندك هو أهم من القانون
عايز الناس تديلك حقك اوعي تجور علي الغلبانين
فكر مره بعقلك وافهم ان أصلك هو الطين
ولا فاكر ان طينتك غير طين كل المخلوقين
لأهلك اوعي تقطع صلتك وخاف من دعاالمظلومين
ربك فاتح ليها بابه طالعه لفوق والناس غافلين
تعاود تاني وفيها اجابه بهلاك ووعيد للظالمين
شفت الظلمه خدوا حذرهم وظنوا خلاص متمكنين
أمن الدوله بكل وسيله وكل خطوه وفيها سين
لما أراد ربك يفضحهم ويذل جميع المفتريين
طلعوا شباب وايديهم عزل وعلي الله متوكلين
برسايل علي الفيس مبعوثه بره حساب المسئولين
في الاول أخدتهم عزه وقالو ااخوان أوسلفيين
وربك لما بيريد أمره بيسخر كل الموجودين
اللي كان فرعون وطاغي بيبكي بدمع المذلولين
واللي كان بيحيي ويهتف بقي شكله تافه ومشين
لكن لازم ناخد عبره ونفكر فيها بعقل رزين
قبل مانرجع نندم بكره ونلقي نفسنا من الخاسرين
اوعي تنام والحقد في قلبك ساكن فيه جوه ودفين
وخلي لسانك شاكر دايما واستغفر وقول يامعين


الساعة الآن 08:34 AM.

Powered by vBulletin® Copyright ©2000 - 2020, Jelsoft Enterprises Ltd.
Content Relevant URLs by vBSEO 3.3.0 , Designed & TranZ By Almuhajir
جميع الحقوق محفوظة لمنتدى قصة الإسلام