منتدى قصة الإسلام - يا مواهبك يا مصر ,,, إدخل وصدقنى لن تندم

بسم الله الرحمن الرحيم

السلام عليكم إخوانى

ما رأيكم فى هذا الموضوع ,, رأيته فى أحد المنتديات فأعجبنى ,, والحمد لله أنا مش من القاهرة وما أنزلها إلا لضرورة قصوى ,,

إلى الموضوع

http://up5.q8lots.net/uploads/images...09c4f6cf8e.jpg

أتوبيسات مصر

مصر يا أخوانا مشهورة بالأهرامات وأبو الهول ، والقلعة .

ده بره ، لكن جوه فهيه مشهورة بينا إحنا يا معشر الموظفين بالأتوبيسات .

أتوبيسات في غاية النضافة ، وفي غاية الأحترام لآدمية المواطن ، الكراسي بتاعتها فل الفل ، والأرض نضيفة .

والكمسري خلوق ، والسواق مؤدب ومتمكن في السواقة بهدوء .
( بصراحة أنا لامست ذلك فعلا فى الغالب عندما أكون فى القاهرة أنا اللى بقولكم أنا الحنين )

لا الكمسري قليل الأدب وبيشتم فيك ، ولا السواق بيسوق زي المجنون .

بجد أنا بشفق علي الدول الأوربية التي حرمت من نعمة وجود أتوبيسات فيها زي أتوبيسات مصر .

وفي النهاية أحب أقول إني مبسوط جدا جدا بالمواصلات ، وبأنادي بتعميم تجربتنا الرائدة في الأتوبيس لجميع دول العالم ، وعلي رأسهم أمريكا ، خلينا نشمت شوية إحممم قصدي نفرح إننا قدرنا نخدم البشرية .

بالنسبة لأبناء الأقاليم أمثالى المعتادين على الانتقال من طرف محافظتهم للطرف الآخر فى مدة لا تتعدى الساعة، فركوب أتوبيس فى رحلة قصيرة داخل القاهرة هو بمثابة فيلم رعب..

لكن بعد شوية الواحد بيألفه ويتعود عليه ويدرك قيمته الكبيرة فى تشكيل ملامح شخصيته وصهر معدنه وصبه فى قالب يحمل عبارة «صنع فى مصر».. فرحلة واحدة من رحلات أحد الأتوبيسات الحكومية قادرة على أن تثرى جميع جوانب حياتك بلا استثناء..

فمن ناحية الجانب الغذائى، فعربيات السجق والكبدة الموجودة فى المحطة وبائعو الشيكولاتة واللبان داخل الأتوبيس يتيحون لك وجبة متكاملة العناصر الغذائية وبأسعار فى متناول الجميع..

فى الجانب الثقافى مدة الرحلة قد تغريك لإحضار كتاب أو جريدة وربما نزل عليك الوحى فألفت قصيدة أو قصة قصيرة أو رواية ملحمية من 3 أجزاء قد تتحول لفيلم سينمائى يؤلف ويمثل ويعرض وأنت لسه ما وصلتش المحطة بتاعتك..

أما الجانب الرياضى فبين رفع الأثقال إذا كنت من حاملى الشنط والتوازن على قدم واحدة والتعلق فى العارضة المعدنية سابحا فى الفضاء لعدم وجود مكان لقدميك على الأرض كل هذا يؤهلك لمسابقات ألعاب القوى والجمباز والدخول لموسوعة جينيز للأرقام القياسية.. ولا نغفل الجانب العاطفى اللى بتثريه الرحلة بعدة أشكال..

لو أنت محترف أتوبيسات قسم تحرش ياسعدك يا هناك، أما لو كنت أكثر رومانسية فممكن تكون شاهدا على قصة حب قد تكلل بالزواج ولو مشوارك طويل شوية ممكن تشهد ميلاد أول أطفال الزوجين وممكن قوى يسموه على اسمك (ما انت عشرة بقى من أول الخط وانت متابع الحوار بين الزوووووووملالالالا)... ( ودى والله أنا شفتها حقيقة كنت مروح بالليل وواحد جالس جمب الشباك وعمال ييتكلم برده ,, وعمال يقول عاوزين نتعرف ..وكلام من دا تخيلوا بقا الوضع دا ,, والله أنا صعب عليا الرصيد اللى ضايع فى الفاضى ,, يا ريته بيكلم خطيبته ,, ع الأقل الرصيد هيروح فى حاجة هينة شوية وإفتكرت د صفوت حجازى لما قال إن المصريين بيصرفوا كام مليارجنيه سنويا على الرغى - كما قالت الجريدة التى نقل منها الدكتور صفوت الخبر ,, وعجبى ,, كملوا المقال .. )

أما الجانب الصحى بقى فعندك من أول وصفات الركاب بغلى ورق الجوافة ولف صدرك بورق الجرايد.. لغاية خطة الوزارة الرشيدة فى تعويدك على استنشاق خليط غازات العادم اللى هيخليك منيع ضد أى حروب كيميائية ممكن تشن على البلاد فى المستقبل البعيد..

أما عن الجانب الدينى فرحلة الأتوبيس هتقويه عن طريق ختمك للمصحف فى الطريق (قراءة وحفظا وتجويدا) أو إخراج زكاتك للمتسولين أو التفكر فى حكمة الله اللى خلت الناس المبسوطين يبنولهم مطار أنفاق وإنت فوق الأرض تكح تراب..

ويا سلام بقى لو الأتوبيس شاور عقله ونط بيك من فوق كوبرى، كده بقيت شهيد يا عم وضمنت دنيا وآخرة.. والخلاصة هى: ممكن جدا الأتوبيس ما يوصلكش المكان المطلوب فى الميعاد المناسب.. لكن شوف التجربة نفسها بتفيد حياتك أد إيه؟.. ولكل هذه الأسباب فأنا أعلن رسميا الانضمام لرابطة محبى ركوب أتوبيسات القاهرة وهنيئا لنا بركوب الأتوبيسات وهنيئا لركوب الأتوبيسات بينا.

أيه رأيكم ,,, والله متأكد إنكم ع الأقل هتبتسموا

خلوا بالكوا لخبطتة الألوان دى مقصودة كى تتماشى مع الموضوع :1008::1008::1008:
:1004::1004::1004: