بيدي لا بيدي عمرو
 

بسم الله الرحمن الرحيم

أنا هخش في الموضوع على طول
طول عمري وأنا بسمع أنتقادات كل الناس للحكومه أهلي وأقرايبي وصحابي والمدونات والجرايد المعارضة بس هل حقا الحكومه هي السبب في حال مصر المحزن دلوقتي
لما سافرت بره مصر لقيت حاجات غريبه أول مره أشوفها
لقيت الشوارع منظمه والعربيات ماشيه بنظام جدا , لقيت كل حاجه منظمه , الأتوبيس الناس بتطلع من أدام وبتنزل من الباب أل وره , لقيت الأتوبيس بينزل الناس على الرصيف مش في نص الشارع , محدش بيزعق في الطوابير مهما كانت ممله , حتى السلم الكهربائي عملين نظام ليه أل عايز يوقف على اليمين ويسيب فراغ على الشمال للعيز يجري علشان مستعجل . في أماكن مرور للمشاة بيحترمها كل العربيات مهما كان مسرع بيقف ليك أو في أشارات للمشاة
دي أول مشكله النظام .دي مشكلة مين هل الحكومه هيه أل هتخلي الناس تلتزم بالمرور وتمشي بنظام بدل السيرك أل في الشارع يعني مثلا في هل في أي سواق بياخد باله
من الخطوط البيضا أل بتحدد اطريق للعربيه في الشارع lane يعني بره الناس بتمشي في lane وبتتلتزم بيه أحنا في مصرللأسف ولا كأن الخط موجود أنا نفسي مكنتش ألاحظه ألا لما سافرت بره وشفت الناس بتحترمه. وبعدين المكروباص في الزحمه وقت الخروج من الكليه مثلا بيبقا الطلوع بالضرب هل دي مشكلة الحكومه يعني بيبقا عذاب ومفيش فرق بقا بنات ولاد كبار صغيرين كله بيزق ويطلع يعني العذاب اليومي ده مشكلة الحكومه ولا مننا أحنا لو نتخيل أن الموضوع بقا منظم والناس تقف طابور أل جاي الأول يركب الأول والمكروباص ينزل الناس على الرصيف أوأقرب حته منه مش في نص الشارع ويبقا كل مصري يحترم أدمية أخوه المصري .
لما نمشي في الشارع بالعربيات بنظام ورا بعض مش يبقا الموضوع كل أل يلاقي خرم أبره يخش فيه ويزنق على الناس التانيه . لما مكان مرور المشاة مفيش عربيه تقف عليه وتسيبه للمشاه على فكره مكان عبور المشاه هو الخطوط البيضا أل على الأرض ودي برضه معرفتهاش ألا من بره للأسف .
لما نبطل تزمير في الشارع على الفاضي والملليان . بجد تخيلوا معايا لو الموصلات بتتركب بسهوله منغير حرقة دم والعربيات بتمشي بنظام مش السيرك ده لو بننزل من الموصلات بكرامه مش في نص الشارع أنا عايز حد يقولي أنه شاف سواق أتوبيس بينزل الناس على الرصيف .
شارع البحر مثلا في أسكندريه مفيش حد بيلتزم بالسرعه القصوى أل هيه 60 كله بيطير أسرع منها وفي مقابل ذلك كل يوم حوادث ووفيات من شارع البحر يعني الحكومه هتمسك واحد واحد تقوله هدي السرعه السرعه القصوى دي مش حاططها عربجي ده حاططها ناس بتفهم علشان سلامتك أنت وأهلك وأقرايبك وحبايبك
يعني المواصلات بتاخد وقت طويل من حياتنا أذا كنا مستريحين فيها بجد هتخلينا أسعد ومستريحين ودي حاجه في أيدينا مش في أيد الحكومه
يا ريت نبطل ننتقد الحكومه ونركز في أخطائنا ونصلحها وأن شاء الله هكتب عن حاجات تانيه في أيدينا نقدر نخلي بيها حياتنا سعيده ومريحه منغير مانحتاج من الحكومه وتذلنا وأن شاء الله أذا أحنا أتغيرنا الحكومه لوحدها هتتغير

بارك الله فيك