منتدى قصة الإسلام

منتدى قصة الإسلام (http://forum.islamstory.com//index.php)
-   المنتدى العام والهادف (http://forum.islamstory.com//forumdisplay.php?f=104)
-   -   قصة حقيقية هزت قلبى ؟ (http://forum.islamstory.com//showthread.php?t=71424)

انصر النبى محمد 14-07-2014 04:39 AM

قصة حقيقية هزت قلبى ؟
 
السلام عليكم ورحمة الله وبركاته

( القصة من صفحة مهذبون )

علمتُ أنه لا اله إلا الله وحده لا شريك له

الموقف ده حصل بالظبط إمبارح ...

احدى الصديقات اشترت وجبات عشان توزعها ولأنهم كانوا كتير اضطرت تقف في الشارع منتظرة تاكسي يوديها المكان اللي كانت رايحاله توزع فيه .. ويعدي واحد ورا التاني والجو حار والشمس حارقة والأمل في الله لا ينقطع في إنها تلاقي سواق يوافق يلف معاها في الحر والزحمة دي عقبال ماتوزع كل الوجبات .. ثم يأتي هذا الرجل العجوز يقف وياخدها هي والوجبات الحمدلله

أول ماتركب تقوم تسأله حضرتك عندك أولاد قد ايه ؟
عندي 3 يابنتي .. وحضرتك والمدام يعني 5 ... سكت شوية وقال لا احنا 4 المدام توفت من فترة قريبة
قامت مدياله أول 4 وجبات الراجل فضل متنح شوية وخد الوجبات وهو على وشك البكاء ولكنه فضل ساكت
مشي بيها من طريق غير الطريق عشان يشاء ربنا انها تشوف مجموعة من الناس المستحقين للاطعام وتديهم الوجبات سبحان الله مع انها كانت رايحة لغيرهم بس صح الرزق بيروح لصاحبه .. ده أول درس

في أثناء الطريق يجي للسواق العجوز ده تليفون عبارة عن مشادة بينه وبين واحدة واضح كده انها واخدة منه حاجة ومش عايزة ترجعها وتنتهي المكالمة بكم هائل من ( حسبي الله ونعم الوكيل ) والراجل ابتدت أعصابه تتعب مبقاش حتى قادر يسوق .. الصديقة طبعا حست ان فيه مشكلة ما سألته على حرج الراجل رد وكأنه شايل هم كبير وحكى الآتي

الزوجة توفت من فترة قصيرة وهو أصيب بعدها بمشاكل في الكلى اضطرته انه يروح يعمل غسيل كلى راح بالفعل عشان يجيب علاج على نفقة الدولة طلبوا منه أول مرة تكون على حسابه والباقي هم هيتكفلوا بيه ولأن مرضه أثر على شغله مبقاش قادر يشتغل وبالتالي مكنش معاه تمن أول جلسة غسيل كلى

بنته الكبرى فرحها بعد العيد اضطرت من وراه تبيع الامبوبة بتاعتها عشان تجيب فلوس أول جلسة غسيل لوالدها وهو مكنش يعرف
المكالمة كانت من الست اللي اشترت الامبوبة حكتله اللي حصل وطلب منها انها ترجعها لبنته ووعدها انه هيسددلها الفلوس حاجة فحاجة بس هي رفضت وعشان كده كان عمال يقول حسبي الله ونعم الوكيل

السواق قال للصديقة انه واخد التاكسي ده من صديق له عشان يشتغل بيه النهاردة عشان يجيب تمن اول جلسات غسيل الكلى وانه مكنش لسه جاب تمن اكل لاولاده وانه اصلا مش بيمشي من الشارع ده ومش عارف ليه مشي منه وعشان كده سكت لما هي اديتله الوجبات عشان حس ان ربنا مش ناسيه هو واولاده .. وده تاني درس

الصديقة كمان فاجئته واديتله فلوس لاول جلسة غسيل كلى وفلوس يشتري بيها أمبوبة لبنته في جهازها بدل اللي هي باعتها
هنا بقى الراجل مبقاش قادر يسوق وقف التاكسي وانهمر في بكاء شديد شديد .. مفيش على لسانه غير الحمدلله ويارب كنت عارف انك مش هتنسانا
وبص للصديقة وقالها انتي يابنتي بجد ولا انا بيتهيئلي انتي ربنا بعتك ليا عشان كنت نازل من البيت وشايل هم كبير مكنتش عارف انه الرزاق
الصديقة مش قادرة أوصفلكم احساسها كان ايه في كل ده
هي ردت عليه وقالتله .. يرزق من يشاء بغير حساب .. وده تالت درس
طبعا بعد ما استجمع قواه ساق التاكسي ووصلها المكان اللي كانت رايحاله وهو في حالة بكاء هيستيري يمكن لحد ماسابته ونزلت وهو شاكك إنها كائن بشري ولا ملاك ربنا بعته ليه

أنا اتعلمت حاجات كتير قوي من القصة دي أولها إن كل شيء بيحصل في حياتنا بقدر له سبب وله غاية .. الدنيا دي كل شيء فيها بحساب مفيش حاجة بتحصل كده عبثا

الحاجة التانية اللي اتعلمتها إن ربنا مبينساش حد وإن كلنا أسباب بس لو ننتبه
الحاجة الأخيرة والأهم إنه فعلا ( يرزق من يشاء بغير حساب )
ثم علمتُ أنه لا اله إلا الله وحده لا شريك له

اللهم لك الحمد حتى ترضى حمدا كثيرا طيبا مباركا فيه
__________________________________________________ ___
منقول


الساعة الآن 02:41 AM.

Powered by vBulletin® Copyright ©2000 - 2020, Jelsoft Enterprises Ltd.
Content Relevant URLs by vBSEO 3.3.0 , Designed & TranZ By Almuhajir
جميع الحقوق محفوظة لمنتدى قصة الإسلام