المساعد الشخصي الرقمي

مشاهدة النسخة كاملة : أبو لهب ( نزف قلم : محمد سنجر )


محمد سنجر
09-10-2009, 12:16 AM
اختلط الحابل بالنابل ، الجميع يفرون في كل اتجاه ،
النار تفترس بشراهة كل ما يعترض طريقها ،
تقفز من بيت لبيت كالبرق ،
صرخات الاستغاثة تتعالى هنا و هناك ،
ألسنة اللهب تطاول النخيل ،
سحب الدخان الأسود تحجب الرؤية ،
الضوء و الحرارة الناتجة عن النيران حول الليل ظهرا ،
على أطراف القرية هناك ،
صوت دقات قبضة قوية متتالية على باب الدار الخشبي العتيق ،
ضوء المصباح يتسلل من بين فتحات إحدى نوافذ الطابق العلوي ، تستيقظ المرأة مذعورة ،
وكزة نسائية يقفز لها الزوج جالسا ، يصرخ )
ـ الله أكبــر ، الله أكبر ، فيه إيــــــــــــه ؟ فيه إيه يا ولية ؟ حرام عليكي ، بتزغدي بهيمة و الا حمار ؟
ـ ما تفز ياعمدة تشوف مين البقف اللي بيخبط بالشكل ده في ساعة زي دي ...
ـ هو فيه حد بيخبط ؟
( ينتبه لصوت الدقات المتتالية ، ينزل سريعا من فوق السرير الحديدي العالي ، تزل قدماه فيسقط أرضا )
ـ سلامتك يا سبع البرمبا ، هي هي هي هي ...
( يحاول لملمة ما تبقى له من كرامة ، يتجه إلى النافذة ، يفتحها صارخا )
ـ ميــن ؟ ميـــــــــــــــــن ؟
( يظهر رجل ضخم الجثة يرتدي ملابس الخفر و بندقيته على كتفه )
ـ الحق البلد بتولع يا عمدة ...
( عندها يلتفت العمدة إلى ألسنة اللهب التي تتعالى هنا و هناك ،
يصل إلى مسامعه صرخات أهالي القرية ، يتساءل )
ـ يا مصيبة سوخة ، النار دي قايدة في دار مين يا شيخ الخفر ؟
ـ دي مش دار واحدة يا حضرة العمدة ، دي ماسكة من دار ( زنوبة أم حمايد ) و انته جاي ، الحق اتصل لنا على المطافي بسرعة .......
ـ مطافي إيه يا ابو مخ تخين ؟ مطافي مين الساعة دي ؟ دي عبال لما المطافي تيجي تكون البلد ساحت ، بسرعة تلم الغفر و تروح على الدوار
و كل واحد يجيب طفاية حريق من اللي العمدة الصغير باعتها من مصر و تحصلوني على هناك ، يلا بلاش لكاعة ، بسرعة ....
ـ أوامرك يا حضرة العمدة ، حالا أهوه
( يجري شيخ الخفر إلى مكان النيران التي بدأت تتأجج أكثر فأكثر ، يسأله أحد الخفر )
ـ أمال فين المطافي يا شيخ الغفر ؟
ـ ما لكش دعوة انته ، لم لي بسرعة الغفر و خليهم يحصلوني على دار العمدة القديم ، و انته تفضل واقف هنا لغاية لما يجي حضرة العمدة ، إياك حد يهوب ناحية النار ، سامع و الا لأ ؟
ـ أوامرك يا شيخ الغفر ...
( أخذ الأهالي يشمرون عن سواعدهم ، منهم من اخذ يساعد الأطفال و النساء الذين حاصرتهم النيران ، و البعض الآخر يجري بالأواني النحاسية إلى الترعة يملأها بالماء ، و البعض يقذف النار بالتراب و الماء لإخمادها ، و لا فائدة ،
النيران تزداد شراسة ، ظهرت و كأنها تباريهم ، يحاولون إطفائها من اليمين ، تتأجج من اليسار ، يسارعون لإخمادها هنا ، تتعالى ألسنتها هناك ،
لكن الرجال ما زالوا يقاتلون في بسالة ،
صرخات العمدة التي تأتي من بعيد ترهب الناس و تجعلهم يتوقفون للحظات )
ـ إنته بتعمل إيه يا غبي انته و هوه ؟ و انته يا غفير يا اللي واقف زي الجاموسة ، سايبهم إزاي يقربوا من النار بالشكل ده ؟ دا أنا منبه عليكم و قايل ما تخلوش حد يهوب ناحية النار لغاية لما المطافي تيجي ، حصل و الا ما حصلش ؟
ـ حصل يا حضرة العمدة و شيخ الغفرقال لهم الكلام ده كله ، بس ما حدش عبر كلامك في الجزمة القديمة .
ـ و اللي انته شايلها على كتفك دي لازمتها إيه يا بجم ؟
( يقترب من أذن العمدة هامسا )
ـ يعني أطخ اللي ما يعبرش كلامك في الجزمة و على مسؤوليتك ؟
( يوكزه العمدة في كتفه )
ـ البهيم ها يفضل طول عمره بهيم ، لكن ها أقول إيه ؟
( يغمز له بعينه بينما يهمس )
ـ عيارين فشنك ، تهويش في الهوا مش أكتر يا بهيمة معشش في مخها حمار معشش في مخه شوية بهايم ( يرفع صوته )
إياكم حد يهوب نواحي النار لغاية لما المطافي تيجي ، أديني بانبه أهوه .
( صرخة طفلة تشق سكون الإذعان الذي خيم على الوجوه ، حاول أحد الشباب اقتحام النيران في اتجاه الصرخة ، عندها يمسك الخفير بجلبابه بينما يصرخ العمدة في وجهه )
ـ إنته رايح فين يا مجنون انته ؟ مش شايف النار عاملة إزاي ؟
ـ و حضرة العمدة قال لي اللي يقرب من النار ها أطخه .
ـ و البت اللي ها تولع دي يا عـــــالم يا هــــــــــوه ؟
ـ يعني البت تولع و إلا انته ما تعبرش كلام أبوك العمدة في الجزمة ؟
( تصرخ البنت ، عندها يحاول الإفلات بجلبابه من قبضة الخفير ، و لكنه لا يفلح إلا بتمزق جلبابه من شدة الجذب )
ـ ده انت اللي تولع بجاز وسخ انته و العمدة بتاعك ....
( ا نفلت الشاب منطلقا إلى وسط النيران ، عندها تفور دماء الناس بالثورة ، ألهب الحماس ظهورهم ، البعض منهم عاد يملأ الأواني بالماء يلقيها على ألسنة اللهب ، لم يعد أحد يعبئ بصرخات العمدة و طلقات بندقية الخفير في الهواء ،
مر الوقت دهرا حتى استطاعوا السيطرة على ألسنة اللهب ،
بدأت النيران تنحسر هنا و هناك ،
دقائق أخرى من العمل الجاد حتى خفتت النيران شيئا فشيئا ،
اللهم إلا بعض الأدخنة المتصاعدة من مكان لآخر ،
خيم الصمت على المكان ،
استلقى الرجال أرضا من شدة التعب و الإجهاد ،
عندها وقف العمدة وسطهم يصرخ )
ـ بقى بتكسر كلام العمدة ياد يا حسن يا أبو سليمان ؟ ليلتك هباب ، اقبض عليه يا غفير ، هو و كل اللي شارك في الجريمة دي ، و تاخدهم دلوقتي حالا على دوار العمدة .
( بدأ الخفر في تقييد أيادي بعض الرجال و اقتيادهم إلى دار العمدة ،
فجأة شق سكون الليل صوت سيارة الإطفاء ،
بدأ ضوءها يقترب يدور مترددا على أعالي الأشجار و جدران البيوت ،
من بين الأدخنة يظهر شيخ الخفر يركب عربة يجرها حمار ، يجلس فوقها الخفر و قد ارتدى كل منهم ملابس رجال الإطفاء و يمسك بطفاية حريق ، يمسك أحدهم ببوق ورقي يقلد صوت سيارة الإطفاء ، بينما خفير آخر يقف حاملا مصباحا يدويا يدور به فوق العربة ، يتساءل شيخ الخفر )
ـ فين النار يا عمدة ؟
ـ الأهالي كسروا كلامي و طفوها ، بس يا ويلهم يا سواد ليلهم مني .....
ـ و العمل يا كبير البلد ؟ يعني ها تسيبهم كده و همه ما عبروش كلامك في الجزمة القديمة ؟
ـ ما خلاص بقى يا شيخ الخفر ، خلاص ، خلااااااااااااص .
( يهمس في أذن العمدة )
ـ طب و ها نعمل إيه دلوقتي في طفايات الحريق اللي ها تقعد في أرابيزنا دي ؟ دا احنا ما صدقنا نولع في البلد من غير ما حد ياخد باله ....
( يصيح العمدة في أهالي البلد )
ـ العيال اللي طفوا الحريق بالشكل ده ها ياخدوا جزاءهم ، الموضوع مش ها يعدي كده بالساهل ....
( يصرخ شيخ الخفر في الجموع )
ـ هو سلق بيض ؟ و الا كان سلق بيض ؟ طفوا إيه إن شاء الله ؟
طب و النار اللي قايدة تحت الرماد دي ؟ مش شايفين الدخان طالع منها إزاي ؟
ـ و دلوقتي لما البلد تنام ترجع تشب تاني ؟ هو مين المسئول عن الأمن و السلامة في البلد دي يا عالم ؟
ـ انته طبعا يا حضرة العمدة ...
ـ يعني أرواحكم متعلقة في رقبتي ، و سلامتكم هي أهم حاجة عندي ، و مش ها اسمح أبدا لشوية عيال صيع يضحكوا عليكم و يقولوا كذب و بهتان إنهم طفوا الحريقة ، لازم كل حاجة تتعمل زي ما بيقول الكتاب ،
أما بخصوص تمن الطفايات اللي جاية لكم مخصوص من مصر ،
و لا يكون عندكم فكرة ، ها اقسطها لكم ، يعني مش واخد منكم حاجة دللوقتي لغاية المحصول إن شاء الله ، و بعدين دي كلها كلام فاضي ، بسرعة يا لا يا غفير انته و هوه ،
ولعوا لنا النار في البيوت دي من تاني ،
ولـــــع ولـــــــــــع ولــــــــــــــــــع .

محمد سنجر
09-10-2009, 05:15 AM
جزاك الله كل خير أخي في الله


لا حول ولا قوة إلا بالله

معرفش ليه فكرتني خالص بموقف الحكومات أيام محرقة غزة

يمكن لأننا كنا المفروض نلعب دور أهالي القرية في القصة

ألي للأسف مقمناش بيه ,وسبنا أهلنا يتحرقوا وتدافع عنهم "حماس"

يمكن لأني علمت بتأمر عباس مع نتينياهو على غزة

أشعر أنها تمثل واقعنا المرير:yoyo:

الله المستعان

حضرتك مبدع:thread_con::thread_con::thread_con:



بارك الرحمن خطاك




شكرا جزيلا
اختنا الفاضلة
تقوى الله


مع الأسف

هذا هو حال أصحاب المصالح

و لا يهمهم أبدا ما يعانيه الفقراء و الضعفاء


المهم كم سيحصلون على مكاسب من وراء آلام و جراح الآخرين

دمتم بحفظ الله

Dr.asmaa gamal
09-10-2009, 06:10 AM
مرحبا بك اخي المبدع أ.محمد

دائما محدد هدفك في الصميم :1012:

أوجزت فأنجرت

موفق دائما بحول الله وقوته و مزيد من التقدم



http://www.yesmeenah.com/smiles/smiles/49/e1%20(5).gif

مصطفى الديب
09-10-2009, 06:30 AM
اخي الفاضل : جزاكم الله خيرا كثيرا
بجد اخي انا تقريبا متابع كتاباتك
رائعة جدا اخي
اسال الله ان ينير دربك وبصيرتك
اللهم امين
بارك الله فيك

محمد سنجر
09-10-2009, 09:34 AM
مرحبا بك اخي المبدع أ.محمد

دائما محدد هدفك في الصميم :1012:

أوجزت فأنجرت

موفق دائما بحول الله وقوته و مزيد من التقدم




http://www.yesmeenah.com/smiles/smiles/49/e1%20(5).gif



أختنا الفاضلة
د . أسماء جمال

شكرا جزيلا لكم

على طيب ردودكم

و بارك الله فيكم و لكم


دمتم بحفظ الله

محمد سنجر
09-10-2009, 09:36 AM
اخي الفاضل : جزاكم الله خيرا كثيرا

بجد اخي انا تقريبا متابع كتاباتك
رائعة جدا اخي
اسال الله ان ينير دربك وبصيرتك
اللهم امين

بارك الله فيك

أخي العزيز
مصطفى الديب

إنها لشهادة تقدير
أثبتها بين حنايا القلب

فمتابعتك لخربشات قلمي
شرف لا يدانيه آخر

دمت بحفظ الله


تقبل مودتي و تقديري

حنان
09-10-2009, 01:43 PM
أستاذنا الكريم

قصة جميلة جدا

تعرف أنى لاأحب التأخر بالرد على إبداعاتك لكن كان عندى مشكلة بالنت

وقد رأيت القصة بمنتدى آخر وأعجبتنى جدا

بارك الله فيك ياصاحب الحس المميز

بس العمدة دة عايز ينطخ عيارين

مش هوة برضة بتاع التليفونات

وإلا دة واحد تانى واحنا ماشاء الله الخير عندنا كتييييييييير

http://www.samysoft.net/forumim/shokr/2/80898296.gif

ياسر ابوزيد
09-10-2009, 10:42 PM
جزاكم الله خيرا

محمد سنجر
11-10-2009, 01:59 AM
أستاذنا الكريم

قصة جميلة جدا

تعرف أنى لاأحب التأخر بالرد على إبداعاتك لكن كان عندى مشكلة بالنت

وقد رأيت القصة بمنتدى آخر وأعجبتنى جدا

بارك الله فيك ياصاحب الحس المميز

بس العمدة دة عايز ينطخ عيارين

مش هوة برضة بتاع التليفونات

وإلا دة واحد تانى واحنا ماشاء الله الخير عندنا كتييييييييير


http://www.samysoft.net/forumim/shokr/2/80898296.gif






شكرا جزيلا

أختنا الفاضلة
حنان

على ما عودتمونا دائما من طيب رد

نعم هو نفس العمدة
بتاع التليفون المجاني و هو نفسه بتاع السلعوة


هو العمدة القوي الذي يريد أن يضعف الضعفاء أكثر و أكثر


كي يزداد قوة أكثر فأكثر


هو نفس الذي يقوم بعمل المرض و تجهيزه معمليا

و يقوم بتسريبه للفقراء و الضعفاء

ليبيعهم دواءه الذي لا يملكه سواه


و لا حول و لا قوة إلا بالله العلي العظيم

محمد سنجر
11-10-2009, 02:01 AM
جزاكم الله خيرا


و جزاكم الله خيرا


أخي الحبيب

ياسر أبو زيد


دمت بحفظ الله

dr.asmaa
13-10-2009, 11:13 AM
جزاك الله كل الخير استاذنا الفاضل

قصة حضرتك تجسد واقعنا المرير

بارك الله فيك