السلام عليكم ورحمة الله
بثا لروح المرح وخروج بسيط عن الجو السياسي ومشكلاته المزدحمة ، أردت أن أقدم بعض الأبيات الطريفة تناولت فيها بعض جوانب مشكلة الزواج .............
عذاب العزاب أنا عازب عايش في عذاب * * ولعذابي كتيرة الأسباب
بأتمنى أتجوز وأتهنى * * وبسرعة دي حياتي هباب وأخلف عيال كتير * * بنات ورجالة بأشناب
وأتخلص من نار الوحدة * * دي الشهوة ليها أنياب
أنا عازب بأتمنى الفرحة * * ساعدوني يا أهل يا أصحاب
جربت النت والخطبة * * ويا ما وقفت على أبواب
من حيرتي بخرت نفسي * * ولفيت وزرت الأعتاب
* * * * * * * *
سنة وإتنين مش لاقي جواز * * من ناس مجنونة بتطلب ألغاز
ناس حجتهم كون نفسك * * بيرموا حجارة وكانوا قزاز
وعلشان أحقق زي ما طلبوا * * هارجع وأنا ماشي بعكاز
بيطلبوا حاجة فوق الوصف * * خايف أولع نفسي بجاز
الجواز تيسير ومودة * * مش خناقات وقنابل غاز
كل شوية بأغير نفسي * * وكأني بأطلب إعجاز
* * * * * * * *
كنت الأول قاعد عاطل * * قالوا جوازك ها يكون باطل
جاتني وظيفة حرة شريفة * * قالوا أوعى تكون بتماطل
سألوا وقالوا دخلك إيه * * قول بصراحة يا ابن الإيه
قلت دخلي الشامل كله * * يدوب يكمل ألف جنيه
قالوا إلعب بره يا شاطر * * مش عاوزين غير باشا أو بيه
* * * * * * * *
وقالوا عاوزين شقة تمليك * * تاخد كل اللي في إيديك
متشطبة أحسن تشطيب * * دهان نجارة سباكة سيراميك
وأوعى تنسى تجيب الشبكة * * دهب ألماظ – ده كله ليك
وبحنيه يقولوا يابني * * زي إخواتها الله يخيك واحجز فرح واحجز زفة * * في الهيليتون أو موفينبيك
هات سجاد ونجف وستاير * * والأجهزة والعفشه عليك
شخلل جيبك وإدفع دمك * * إسرق واشحت من أهاليك
* * * * * * * *
طبعا لسه باكون نفسي * * وطبعا لسه مش ها تجوز حاير ثاير كلي كآبة * * ماشي مدايق ماشي مبوز
لكن ها أصرخ يا أهالينا * * فين التقوى وفين الدين
سودتوا بظلمكوا ليالينا * * وضيعتونا يا خايبين
بنات الليل وبنات الناس * * مين الأوفر فيهم مين
الرحمة لبنات الناس * * والرحمة لشباب مساكين
شرعنا قال الدين معيار * * يبني سعادة وعش متين
خايف أضعف خايف أنهار * * أروح كباريه وأشرب هروين
جوه قلوبنا نار ودمار * * جيل بيضيع وإنتو الجانيين
ولولا حرام الزوجة الكافرة * * كنت طلبت عروسة من الصين
تأليف العازب / أحمد الراجي
مارس 2011
بصراحة استنينا الإخوة الرجال يتفاعلوا مع قصيدتك والتي أحسنت التعبير فيها عن معاناة العزاب، لكن للأسف لم يحصل..
عالعموم أسأل الله أن يسهل لك أمورك وأن يرزقك ببنت الحلال، وأن يزوج كل العزاب